自从康家老二康祈宗远赴非洲做生意之后，使到苏妙婵缺少咗对手戏，一个巴掌拍唔响，令到《外来媳妇本地郎》呢部剧集逊色唔少，唔单止苏妙婵，连“汝好茶餐厅”嘅大厨李彩娇都缺少对手戏，昔日同老板嗌交、扭计、罢工嘅经典场面一去唔再嚟，苏妙婵前两集已经讲过，今集，就讲下李彩娇嘅扮演者，广东话剧院喜剧团团长，国家一级知名演员----吴苏妹。
吴苏妹大姐50年代出生于广东恩平，60年代后期跟随佢嘅父母移居湛江，系湛江接受教育，读书嘅时候，仲因为容貌可爱，被同学称之为“一枝花”。
70年代加入广东话剧院，成为咗一名话剧演员，早系《外来媳妇本地郎》李彩娇成名之前，吴苏妹大姐已经系广东话剧院著名嘅喜剧演员。
参演过多部大型话剧，《生仔梦》荣获第八届中国人口文化奖，《婚恋奇情》荣获建国40周年优秀节目奖，《欲望大厦》荣获省艺术节优秀节目奖，2004年，荣获第五届中国话剧金狮奖，仲主演过小品，当年，系综艺节目《万紫千红》中，经常都见佢演出，佢主演嘅小品《眼睛》，仲荣获过中南五省电视小品大奖赛演员奖。
上世纪八十年代经典短剧《万花筒》，佢都有份参演，2000年，广东电视台推出《外来媳妇本地郎》，系一个偶然嘅机会，佢加入咗呢个大家庭。
剧中，佢扮演一名嚟自广东化州、性格直爽、善良勤劳嘅大厨“李彩娇”，一 口搞笑嘅化州音，加上佢非常接地气嘅表演，征服咗两广观众，深受观众嘅喜爱，从而广为人知，系一名多才多艺嘅表演艺术家。
目前，吴苏妹大姐仍然活跃于广东影视界一线，继续为广大嘅观众奉上精彩嘅表演。