好多人都鍾意「買勞」「戴勞」，除咗突顯身分之外，仲深信萬一有咩事都可以即刻變現週轉。
但如果你係港姐冠軍，咁就未必要「買勞」嚟做個保險，因為你仲有一頂鑲咗鑽石、價值幾百萬嘅后冠可以備用。
當然，要變埋后冠都係迫不得已，就好似1995年香港小姐冠軍楊婉儀咁，早年因為老公生意失敗，爭落過千萬巨債。
為咗清還債務，佢唯有將港姐冠軍嘅后冠都攞出嚟變賣還債。
同時仲要將美國加州嘅物業都一齊抵押出去，生活亦都一下子由上流社會跌落。
早前就有網民喺加州一間超市偶遇楊婉儀。
其他網民見到之後都話佢打扮太過樸素，又話佢断崖式衰老：「脸上鱼尾纹和法令纹好明显」。
仲有人聯繫到佢哋一家之前嘅經濟狀況，所以懷疑佢冇錢保養咁話。
咁其實又唔使咁mean嘅，因為首先人哋自己都唔介意吖嘛。
楊婉儀曾經好豁達咁講過：「我不介意變老，我的內在小孩永遠不老。」
咁樂觀正面嘅態度，又真係完全唔care網民點睇點講，繼續過自己平淡但充實嘅生活。
56歲嘅楊婉儀細細個就移民咗去美國，未選港姐之前嘅1991年就攞過全美華埠小姐亞軍。
之後參選港姐頂住雙料冠軍入行，因為氣質清純、斯文淡定，喺《真情》、《茶是故鄉濃》等等經典劇集嘅演出都好受關注及歡迎。
2003年嫁入豪門之後生咗一仔一女，開始淡出幕前。
不過原本過緊少奶奶生活嘅佢就好景不常，因為老公生意失敗欠落巨債，搞到有官司及金錢糾紛，所以最終先會有變賣港姐后冠一事。
早幾年一家大細移居美國三藩市之後，楊婉儀就低調生活回歸教育界，教導英文同網上課程。
至於好多人好奇嘅后冠價值幾錢？
雖然TVB及佢本人從來都冇公開過實際價錢或賣出成交價。
但因為楊婉儀嗰一年係首屆有六字頭嘅珠寶商贊助、鑲有「真鑽石」嘅港姐后冠，所以早期報道就曾經估計可能值 100幾萬到400萬之間。
而根據六字頭珠寶嘅資料，就指類似后冠會用到880粒鑽石，所以最高估值可能高達1000萬。
比較番之後嘅港姐后冠，2015-2016年麥明詩、馮盈盈嗰啲，官方曾經就講過價值428萬到460萬左右。
所以楊婉儀1995年嗰頂后冠點講市值都應該值幾百萬嘅。
不過錢財乃是身外之物，加上就算係港姐冠軍，都對變老及容貌毫不介意毫不焦慮，所以有需要賣咗后冠都應該唔會覺得可惜㗎喇～