江美儀憑《名媛望族》吵架戲翻hit，獲網民大讚。她接受陳志雲的網上節目訪問，笑稱：「我俾人鬧咗十幾年㗎嘛，突然間有一日起身，個個唔鬧你喎，跟住仲要讚你，仲要搵晒你所有嘅廣告、以前啲戲嚟讚，我直情覺得自己係咪去咗另外一個空間。」 2022年她憑《下流上車族》奪視后，本以為事業高峰，她卻坦言「攞完視后就冇劇拍」。雖然2023年她有兩劇《隱形戰隊》及《羅密歐與祝英台》播出，但都是封后前開拍的。她說：「到今時今日，我都唔知我得罪咗邊個、為咩事，得罪嘅原因系咩嘢，完全都唔知」 當時她零收入，直言：「視后真係『事後』呀，真係冇嘢做，呢個係怪。個市唔係咁好，搵錢機會愈嚟愈少，然後銀行啲錢愈嚟愈少！我係簽部頭，冇月薪嘅，我都要生活，咪向外求囉。最難捱嘅時候，我上去（大陸）做直播囉。你勤力嘅話，其實係搵到食嘅，我又唔想真係搬上去（住）。同埋我真係心底話，其實我真係鍾意拍戲嘅，我真係鍾意演戲。」 她自嘲不是「親生女」，跟TVB 只是簽部頭約：「我哋係雙方協議咗一個部頭就要有幾多個騷，咁你就必須要有咁嘅騷。我冇要求做主角，但起碼我要咁多個騷，唔係打散嚟計騷。」她自言本身人工低，哈哈大笑謂：「張糧單，請工人都你唔好攞出嚟！嗰時真係好平。」 江美儀於1992年拍廣告出道，當年最受注意的是與周潤發一起拍洗頭水廣告。1995年參與首部電影《奇異旅程之真心愛生命》，1997年加入亞視拍首部劇集《肥貓正傳》，強調自己無任何捷徑，完全靠實力撐過30年。她感慨謂：「我又冇有錢老竇，又冇同人哋瞓，又冇有權有勢嘅男朋友，乜嘢都冇，屋企又唔有錢！咁就玩咗30年，好奇怪！」 陳志雲坦言現在很喜歡看短劇，江美儀即說：「短劇真係攞命，真係停唔到㗎，你明知佢A加B加C㗎喇喎，但係你都係停唔到。」被問到會否願意拍短劇，她直言：「我哋係唔值錢㗎，佢根本唔需要你，根本唔需要知名度，你諗吓一個佢哋最紅嘅短劇男演員，講緊5萬蚊1日。你依家5萬蚊搵我，咁我梗係拍啦，但係唔會搵你呀嘛，會去搵佢哋嗰班人。依家連綜藝節目都係搵佢哋嗰班人上去，已經唔同咗啦，唔需要有知名度。」 儘管面對挑戰，但現年54歲的她懷着盼望向前，還有很多東西想嘗試，只想繼續拍戲，希望不斷有機會演下去 #港剧推荐[话题]# #江美仪[话题]# #港剧分享[话题]# #港剧经典[话题]# #港剧[话题]# #TVB港剧[话题]# #tvb港剧[话题]#